Category: Python Flask – Tamil

PyCharm என்பது ஒரு ஒருங்கினைந்த நிரலாக்க மென்பொருள். ஆங்கிலத்தில் Integrated Development Environment (IDE) என செல்லும் ஒரு நிரலாக்கக் கருவி. நாம் செய்யும் வேலையின் தரம் நாம் பயன்படுத்தும் கருவிகளைக்கொண்டே இருக்கிறது. ஒரு சிற்பிக்கு அது நன்றாகத் தெரியும். மென்பொருள் உருவாக்கம் சிலை செதுக்குவதைக் காட்டிலும் கடினமான விடயமா என்று தெரியாது, உறுதியாகச் சிக்கலான ஒன்று என்றே நான் கூறுவேன். எனவே நாம் பயன்படுத்தும் கருவிகளும் அதற்கு நிகரானதாக இருக்கு வேண்டும். Notepad, Notedpad++, Emacs, Eclipse, VIM, Atom, VS Code என பலவற்றில் நிரல் எழுதி இப்பொழுது கடைசி 3 ஆண்டுகளாக வருடம் 7-8ஆயிரம் செலவழித்து Professional Edition வாங்கிப் பயன்படுத்தும் அளவிற்கு உடன் நிற்பது PyCharmதான்.

இனி Python Flask தொடரில் வரும் கட்டுரைகள் எல்லாம் நான் அதிலேயெ எழுதப்போகிறேன். நீங்களும் பயன்படுத்துமாறு கேட்டுக்கொள்கிறேன். (உங்க Mind voice கேக்குது. இல்லை. எனக்கு இதில் எந்த ஆதாயமும் இல்லை)

Flask தொடரில் இதற்கு முன் வந்த கட்டுரைகள்:
1. Python Flask என்றால் என்ன?
2. Python Flaskஐ நிறுவுவது எப்படி?
3. Flaskஇல் நம் முதல் செயலி

என்னாது? 7-8 ஆயிரம் செலவழிக்கனுமா?

இல்லை.

PyCharm இல் இரண்டு பதிப்புகள் உள்ளன. ஒன்று காசு கொடுத்து வாங்க வேண்டிய Professional Edition, மற்றொன்று இலவசமாகக் கிடைக்கும் Community Edition. இந்த தொடரில் நான் பயன்படுத்தப்போவது எல்லாமே Community Edition தான். இன்னும் ஏன் யோசனை? https://www.jetbrains.com/pycharm/download/

PyCharm இல்லாமல் இந்தத் தொடரை மேலும் படிக்க முடியாதா?

கண்டிப்பாக முடியும். உங்களுக்கு PyCharm வேண்டாம் என்றால், தாராலமாக உங்களுக்கு பிடித்த கருவிகளைப் பயன்படுத்தாலாம். நாம் Flask கற்றுக்கொள்ள PyCharm அவசியம் கிடையாது. ஆங்காங்கே நான் இடும் படங்கள் PyCharm இன் படங்களாக இருக்க வாய்ப்பு உள்ளது, அதற்கு நிகரான விசயங்களை உங்களுடைய கருவியிலும் பார்த்துக்கொள்ளவும்.

Flask Project உருவாக்கம்

PyCharmஐ திறந்து கொள்ளவும்.

அதில் Create New Project-ஐச் சொடுக்கவும்.

வரும் பெட்டியில் நாம் கொடுக்க வேண்டியது இரண்டு விசயங்கள்:

1. நம் Project-ஐ எங்கு சேமிக்கப்போகிறோம். உங்களுக்கு பிடித்தமான இடத்தை அங்கு கடைசியில் இருக்கு “Browse” பொத்தானை அமுக்கி தேர்வு செய்து கொள்ளவும். புதிதாக ஒரு folder உருவாக்க வேண்டும் எனில் அதை கடைசியில் டைப் செய்து விடுங்கள். எ.கா. என் கணினியில் நான் code எனும் folderஇல் எல்லா projectகளையும் சேர்த்து வைத்து உள்ளேன். அதனால் code எனும் போல்டரை தேர்வு செய்துவிட்டு, /flaskapp என்பதை தட்டச்சு செய்துவிட்டேன்.
2. நாம் எந்த Python version ஐப் பயன்படுத்தப்போகிறோம். உங்கள் கணினியில் ஒரே ஒரு Python மட்டும் இருக்கலாம், அல்லாது பலவையும் இருக்கலாம். எனது கணினியைப் பாருங்கள்

இதில் நாம் எதை நம் செயலி உருவாக்கத்திற்கு பயம்படுத்தப் போகிறோமோ அதைத் தேர்வு செய்ய வேண்டும். நாம் Python 3யைத்தான் இக்கட்டுரைத் தொடரில் பயன்படுத்தவிருக்கிறோம். எனவே Python 3ஐ தேர்வு செய்து கொள்ளுங்கள்.

தேர்வு செய்தவுடன் Create பொத்தானை சொடுக்கவும். இப்பொழுது PyCharm நமக்கான project folderஐ உருவாக்கி அதனுள் ஒரு virutal environmentஐ நமக்கு உருவாக்கித் தந்துவிடும். அது முடிந்தவுடன், PyCharmஇன் project/editor window திறந்து விடும்.

இதில் நாம் தெரிந்துகொள்ள வேண்டிய இடங்கள் 5.

1. இங்குதான் நாம் நம் தரவுகளை எழுதுவோம்
2. இது நம் projectஇல் உள்ள கோப்புகளை பார்வையிட மற்றும் மாற்றங்கள் செய்ய உதவும் Project Tree
3. நம் project folderக்குள் எதேனும் கட்டளைகள் இட விரும்பினால் அதற்கு தேவையான Terminal. இதின் சிறப்பு என்னவென்றால், நாம் source env/bin/activate என்று நமது environmentஐ நாம் activate செய்யத்தேவையில்லை. அது தானாகவே activate ஆகிவிடும். நாம் நேராக நமது வேலையை செய்யலாம்.
4. Python Console – இது உங்களுக்கு எதாவது சிறு சிறு Python வரிகளை சோதித்துப்பாக்க பயன்படும்.
5. Configuration Manager – இங்கு நாம் நமது செயலியை இயக்கிப் பார்க்கத் தேவையானவற்றை பதிவு செய்து, இயக்கி, பிழைகளை கண்டறியும் இடம்.

Flask செயலி எழுதுதல்

கீழே உள்ள terminalஐத் திறந்து, Flaskஐ நிறுவும் கட்டளையை இடவும்

pip install flask

அது முடிந்ததும், project treeஇல் உங்கள் project folderஇன் மேல் வலது-“க்ளிக்” செய்து ஒரு புது Python கோப்பை உருவாக்கவும். அதற்கு app.py என்று பெயரிடுங்கள்.

இப்பொழுது திறந்து இருக்கும் அந்த கோப்பில் நம் முதல் செயலிக்கான தரவைப் தட்டச்சு செய்து கொள்ளுங்கள்.

from flask import Flask

app = Flask(__name__)


@app.route("/")
def home():
    return "Hello World!"

நீங்கள் தட்டச்சு செய்யும் பொழுதே PyCharm உங்களுக்கு உதவ ஆரம்பிப்பதைக் காணலாம்.

முழு தரவையும் தட்டச்சு செய்தவுடன் “Save” செய்து கோப்பை பத்திரப்படுத்திவிடவும்.

செயலியை இயக்கி சோதிப்பது

வலதுபுறம் மேலே உள்ள “Add Configuration” பொத்தானை சொடுக்கவும். உடனே அது ஒரு New Configuration பெட்டியத் திறக்கும்.

இதில் உள்ள + குறியை சொடுக்கி ஒரு Python configurationஐ உருவாக்கவும்.

அங்கு நிங்கள் செய்ய வேண்டியவை 4

1. Script Pathஇல் உள்ள folder பொத்தானை சொடுக்கி உங்கள் projectக்குள் இருக்கும் virtual environment (venv)க்குள் bin -> flask என்பதைத் தேர்வு செய்து கொள்ளவும்.
2. Parametersஇல் run எனத் தட்டச்சு செய்யவும்.
3. Environment Variablesஇல் FLASK_APP=app;FLASK_ENV=development; என்பதைச் சேர்க்கவும்.
4. Nameஇல் “Dev Server” என்று கொடுக்கவும்

அதை OK கொடுத்து மூடி விடவும். இப்பொழுது Dev Sever என்று ஒரு Configuration உங்களுக்கு உருவாகி இருக்கும். அதன் அருகில் உள்ள run பொத்தானை அமுக்கினால், நம்முடைய Flask server வேலை செய்ய ஆரம்பிப்பதைக் காணலாம்.

இதில் Flaskஇன் server ஆரம்பமாகி, நம்முடைய செயலியை நாம் பார்க்க செல்ல வேண்டிய முகவரி இருக்கும். அந்த முகவரியை சொடுக்கினால், சென்ற கட்டுரையைப் போலவே நமக்கு Hello World எனும் செய்தி காத்திருக்கும்.

முடிவுரை

ஒரு terminalஐயும் text editorஐயும் வைத்து செய்த வேலையை இப்படி என்ன என்னமோ configuration எல்லாம் செய்து பயன்படுத்த வேண்டுமா என்று நினைத்தால், கவலைப்படாதீர்கள். இந்த ஒரு முறை இதை செய்து விட்டோம் என்றால் அடுத்த முறை நாம் எதுவும் செய்ய வேண்டியது இல்லை.

திறந்தவுடன் நமக்கு நம்முடைய project காட்டும். சோதித்துப்பார்க்க நாம் நேரடியாக Dev sever ஐ ஆரம்பிக்காலாம். வேலை முடிந்ததும் மூடி விடலாம். Text Editor, terminal, virtual environment activate செய்வது, Flask app பதிவிட்டு பிறகு run செய்வது என பல விசயங்களில் கவனம் சிதறவிடத் தேவையில்லை.

உங்களுக்கு இதில் எதேனும் ஐயங்கள் இருந்தால் கீழ பதிவிடவும். நன்றி.

This work is licensed under a Creative Commons Attribution-NonCommercial 4.0 International License.

சென்ற கட்டுரையில் Flask-ஐ நிறுவுவது எப்படி என்று பார்த்தோம். இந்தக்கட்டுரையில் Flaskஇல் ஒரு இணைய செயலியை (Web application) உருவாக்குவது பற்றி பார்ப்போம்.

முந்தைய கட்டுரையில், இப்படி virtual environmentஐ activate செய்து வைத்து இருப்போம்.

 

அதை அப்படியே விட்டுவிட்டு, அந்த folderக்குள் app.py என்று ஒரு கோப்பை உருவாக்கிக் கொள்ளுங்கள். இப்பொழுது அந்த கோப்பை உங்களுக்கு பிடித்தமான Text Editorஇல் திறந்து அதில் கீழ் கொடுக்கப்பட்டுள்ள நிரலை பதிவிடுங்கள்.

from flask import Flask

app = Flask(__name__)

@app.route("/")
def home():
    return "Hello World!"

அவ்வளவுதான். நாம் நம்முடையா முதல் Flask செயலியை உருவாக்கிவிட்டோம். என்ன நம்பவில்லையா? சரி அப்படியே திறந்து வைத்து இருக்கும் terminalக்கு சென்று கீழே கொடுக்கப்பட்டுள்ளதை செய்யவும்.

குறிப்பு: ஒரு வேலை அந்த terminal-ஐ நீங்கள் மூடி இருந்தால். புதிதாக ஒன்றைத் திறந்து அதில் உங்கள் project directoryக்கு சென்று source env/bin/activate என்று உள்ளிட்டு நம் projectஇன் virtual environmentஐ மறுபடியும் activate செய்து வைத்துக்கொள்ளவும்.

export FLASK_APP=app
export FLASK_ENV=development
flask run

இப்பொழுது உங்கள் கணினியில் ஒரு server ஓட ஆரம்பித்து இருக்கும்

இதில் நாம் முக்கியமாக கவனிக்க வேண்டியது இதுதான்

* Running on http://127.0.0.1:5000/ (Press CTRL+C to quit)

இது நாம் நம்முடைய செயலி எந்த முகவரியில் இயங்குகிறது என்பதையும், இந்த serverஐ நம் வேலை முடிந்தவுடன் எப்படி நிறுத்துவது என்பதையும் சொல்கிறது. இந்த சுட்டியை சொடுக்கிப்பாருங்கள் http://127.0.0.1:5000/ உங்களுக்கு உங்கள் செயலி “Hello world!” எனத் தனது பிறந்தநாள் செய்தியை சொல்லிக்கொண்டு இருக்கும்.

இப்ப இங்க என்ன நடந்துது?

எது எதையோ அங்கும் இங்கும் செய்து இப்பொழுது Hello World! என்பதை காட்டி விட்டீர்கள், ஆனால் இதெல்லாம் எதற்கு செய்தோம், அதன் அர்த்தம் என்ன? – என்று நீங்கள் யோசிக்கக்கூடும். வாங்க பார்க்கலாம்.

from flask import Flask

இந்த வரியில் flask எனும் packageஇல் இருந்து, Flask எனும் classஐ நாம் நமது கோப்புக்கு கொண்டு வருகிறோம்.

app = Flask(__name__)

அந்த Flaskஐ வைத்து, நம் ஒரு appஐ உருவக்குகிறோம். அதற்கு பெயரிட வேண்டும். அதை நாம் வெளிப்படையாகச் சொல்லாமல் __name__ என்பதன் மூலம், அந்த கோப்பின் பெயரையே எடுத்துக்கொள்ளச் சொல்லிவிடுகிறோம்.

நீங்கள் இணையத்தில் உலாவும் பொழுது இணை முகவரிகளைப் பார்த்து இருப்பீர்கள் அவைகளில் / பரவலாகப் பயண்படுத்தப்படும் ஒன்று. ஒரு இணையதளத்தில் பல பக்கங்கள் இருந்தால் அதை / குறிக்கு பிறகு சேர்த்து விடுவது வழக்கம். எ.கா என்னுடையா contact பக்கத்தின் முகவரி https://arunmozhi.in/contact/.

நம் செயலியில் இப்பொழுது இருப்பது ஒரே ஒரு பக்கம்தான்.

@app.route("/")
def home():
    return "Hello World!"

இங்கு, முதல் வரியில், செயலியை எப்பொழுது எல்லாம் முகப்பு பக்கம் தேவைப்படுகிறதோ (“/”) அப்பொழுது எல்லாம் home() எனும் பங்சனை இயக்கச்சொல்லுகிறோம். அந்த பங்சன் என்ன செய்ய வேண்டும் என்றால் Hello World! எனும் வாசகத்தை முகப்பு பக்கமாகத்தர வேண்டும் என்று சொல்லி விடுகிறோம். அவ்வளவுதான், இந்த செயலியை நாம் ஒரு சர்வரில் இணையதளமாக நிறுவினோம் என்றால், எப்பொழுது எல்லாம் ஒருவர் அந்த இணைதளத்திற்கு வருகிறாரோ அப்பொழுது எல்லாம் Hello World எனும் வாசகத்தைப் பார்ப்பார்.

அதற்காக நாம் இணையதளம் எல்லாம் நிறுவ வேண்டுமா? ஒவ்வொரும் முறையும் மாற்றங்கள் செய்தாலோ, அல்லது செயலியை உருவாக்கும் பொழுது எதேனும் பிழைகள் இருந்தாலோ எப்படி அதனை சோதித்துப் பார்ப்பது? அதற்கு Flaskஏ நமக்கு வழிமுறை செய்து தருகிறது. அதைத்தான் நாம் terminalஇல் flask run எனும் கட்டளையின் மூலம் செய்தோம். முதலில் Flaskக்கிற்கு நமது செயலியின் பெயரை சொல்கிறோம், அதுதான்

export FLASK_APP=app
export FLASK_ENV=development

பின்பு, நாம் நமது செயலி உருவாக்க நிலையில் (developmentஇல்) உள்ளது என்பதை பதிவிடுகிறோம். இது நம் செயலியின் இயக்கத்தின் பொழுது எதேனும் பிழைகள் எழுந்தால் அதனை நமக்கு நம் இணைய உலாவியிலேயே (browser) காட்ட உதவும். இதை செய்யாவிடில், பிழைகள் terminal-ஓடு தங்கிவிடும்.
கடைசியாக flask run என்பது நமது செயலியை ஒரு இணைதளத்தைப் போல பார்வையிட ஒரு serverஆ ஆரம்பித்துக் கொடுக்கிறது. நாமும் அது கொடுக்கும் முகவரிக்குச் சென்று பார்க்கிறோம்.

இத்துடன் இக்கட்டுரை முற்றும். என்னது இது, வெறும் இரண்டு வார்த்தைகளை காட்டி முடித்துவிட்டீர்கள்? வண்ண வண்ணமாக நான் HTML பக்கங்களை எப்படி உருவாக்குவது? அடுத்து வரும் கட்டுரைகளில் பார்ப்போம்.

உங்களுக்கு இதில் எதேனும் ஐயங்கள் இருந்தால் கீழ பதிவிடவும். நன்றி.

இலவச இணைப்பு

http://127.0.0.1:5000/who-are-you/ எனும் முகவரிக்குச் சென்றால் “I am a Python Developer” என்று வரும்படி ஒரு புது routeஐ உருவாக்குங்கள் பார்க்கலாம்.

This work is licensed under a Creative Commons Attribution-NonCommercial 4.0 International License.

இந்தக்கட்டுரை நீங்கள் ஏற்கனவே உங்கள் கணினியில் Python install செய்து வைத்துள்ளீர்கள் எனும் கோணத்தில் இருந்து எழுத்தப்பட்டது. Python உங்கள் கணினியில் இல்லை என்றால், https://www.python.org/downloads/ சென்று, பதிவிறக்கி உங்கள் கணினியில் நிறுவிக்கொள்ளவும்.

1. Python 3

நீங்கள் MacOS அல்லது Linux பயன்படுத்துபவராக இருந்தால் 90% உங்கள் கணினியில் Python 2 இருக்கும். நீங்கள் Python 3-ஐ நிறுவிக்கொள்ளுதல் சிறப்பு.

ℹ️ அனைத்து விதாமன Operating System-க்கும் Python 3 நிறுவுவது பற்றிய தகவலுக்கு https://realpython.com/installing-python/

உங்கள் கணினியில் உள்ள “Command Line” அல்லது “Terminal” செயலியைத் திறந்து கீழே கொடுக்கப்பட்டுள்ளவற்றை செய்யவும்.

சிறுகுறிப்பு: நான் MacOS பயன்படுத்துகிறேன், எனவே என்னுடைய Commandகள், MacOSக்கும், Linuxக்கும் சரியாகப்பொருந்தும். Windows பயன்படுத்துபவர்களுக்கு ஒரு சிலவை வேறு படலாம், கவனத்தில் கொள்ளவும்.

python --version

இது உங்கள் கணினியில் உள்ள கணினியில் இருக்கும் Pythonனின் பதிப்பைக்காட்டும். என்னுடைய இரண்டு கணினிகளின் வெளியீடு இதோ.

ஒன்றில் Python 2 இருப்பதைக்காணலாம். நீங்கள் Python 3 நிறுவினாலும், ஒரு சில சமயம் Python 2வே பிரதானமாக இருக்கும். அப்படி இருந்தால் கவலைப்படத் தேவையில்லை. python3 --version என்று அடித்துப்பார்த்து Python 3 இருக்கிறதா என்று சோதித்துக்கொள்ளவும்.

2. Virtual Environment

Flask நிறுவுவதில் முதல் வேலை, அதற்கென தனி ஒரு virtual environemnt-ஐ உருவாக்குவது. இது நம்முடைய project சம்பந்தமான மற்றும் தேவையான விசயங்களை மட்டும் ஒரு இடத்தில் வைத்துக்கொள்ள உதவும். இன்னும் விளக்கமாக்ச்சொன்னால், இன்று நாம் ஒரு இணைய செயலியை எழுத முனைகிறோம், எனவே நாம் Flask நிறுவுகிறோம். நாளை நாம் PyQt துணைகொண்டு ஒரு desktop செயலியை உருவாக்க முயலும் பொழுது அதை நிறுவ வேண்டும். இரண்டுக்கும் சம்பந்தம் கிடையாது, எனவே அவைகளை system Python இல் நிறுவுவதைவிட, நாம் அவைகளுக்கு எனத் தனியாக ஒரு environmentஐ உருவாக்கி அவைகளை தனித்தனியே நிறுவி வைத்துவிட்டோம் என்றால், நாளை எந்த ஒரு மாற்றம் செய்தாலும், அது அந்த ஒரு projectஐ மட்டுமே பாதிக்குமோ தவிற நமதுக் கணினியில் இருக்கும் எல்லாவற்றையும் பாதிக்காது.

என்னடா இவன் “environment” உருவாக்கு என்கிறானே, இதுவே ஒரு பெரிய வேலையாக இருக்கும் போல இருக்கே என்று நீங்கள் பயப்பட வேண்டாம். அதற்கு Python நிறுவும் பொழுது கூடவே வந்த virtualenv என்ற கருவியைப் பயண்படுத்திக்கொள்ளலாம். Command line சென்று, நம் projectக்கு ஒரு directoryயை உருவாக்கி, அதில் ஒரு virtual environment ஐ உருவாக்குங்கள்.

mkdir flask-project
cd flask-project
virtualenv env --python=python3

இப்பொழுது நீங்கள் ls என்று உள்ளிட்டுப் பார்த்தீர்களேயானால், அங்கு env என்று ஒரு folder இருப்பதைப் பார்க்களாம். இதுவே உங்கள் projectஇன் virtual environment.

3. Flask

இப்பொழுது நாம் உருவாக்கிய virtual environmentக்குள் Flaskஐ நிறுவலாம். முதலில் அதனை activate செய்ய வேண்டும். அப்படி செய்யத்தவறினால், நாம் செய்யும் மாற்றங்கள் எல்லாம் கணினியின் system librariesஐப் பாதிக்கும்.

source env/bin/activate

Activate ஆனவுடன், நம்முடை environmentஇன் பெயர் command lineஇல் முன்னே சேர்ந்து கொண்டதைக்காணலாம். இது நமக்கு நாம் எந்த environmentஇல் வேலை செய்யப்போகிறோம் என்பதைக் காட்டும். இப்பொழுது Flaskஐ நிறுவலாம்.

pip install Flask

Flask நிறுவியாயிற்று. அதைக்கொண்டு செயலிகளை எப்படி உருவாக்குவது என்பதை அடுத்து வரும் கட்டுரைகளில் பார்ப்போம்.

உங்களுக்கு இதில் எதேனும் ஐயங்கள் இருந்தால் கீழ பதிவிடவும். நன்றி.

This work is licensed under a Creative Commons Attribution-NonCommercial 4.0 International License.